2009年9月20日 星期日

窮富翁偽作戰



RTHK 的窮富翁大作戰, 睇左幾集, 發覺的女真係揀得幾靚, 而且唔知點解, 的窮人多數好醜樣. 有錢人係高尚的, 比窮人有愛心, 更加關心社會的公義. 係套戲度, 作出犧牲的全部係有錢人: 上市公司主席, 大小姐, 少奶奶同富翁, 他們都紆尊降貴地了解民間疾苦, 又俾心機分析問題, 居然肯同窮人傾偈添! 好能親民呀佢!

呢套真人騷絕對能夠促進社會和諧: 有錢既睇完窮富翁當然更加安樂, 因為佢地而家不單止在物質上富裕, 連心靈都富裕埋; 中產階級要睇, 證明自己向上爬的努力初步得到回報, 自己同下一代可以在有冷氣的豪庭生活, 唔使捱木蚕, 好野! 窮人更加要睇, 因為佢地可以感受到社會既愛同關心, 知道大家在嘆冷氣住大屋之餘都會想起自己, 唔好再諗社會點樣欠左你地!

窮, 無錢, 無冷氣, 捱木蚕係咪好慘? 呢的係佢地日常生活的一部份了,使唔使你派人來大驚小怪呢? 佢地需要的並不是你們的施捨, 更不要扮同情, 唔該你地唔好用佢地的生活來玩 outward bound, 唔好播埋的懶感動的 NBA 慢鏡音樂. 因為根本唔襯---成件事的主角唔係你地班有錢人, 個個話住五日捱唔夠三日就走, 始終要痴住貴價房車同iphone, 在一個不公義的世界中, 富人口袋裡面的錢從來都是從奪取窮人的生活資源而來的, 不過路徑迂迴, 兩者互相見面的時候還以為大家是沒有關係的陌生人而已.

12 則留言:

  1. 「在一個不公義的世界中, 富人口袋裡面的錢從來都是從奪取窮人的生活資源而來的, 不過路徑迂迴, 兩者互相見面的時候還以為大家是沒有關係的陌生人而已。」<--- RIGHT!!! 你說得太好了!!!

    回覆刪除
  2. 咁....使唔使攪共產,使唔使鬥地主,係街上見到乞兒,係咪應該覺得好內疚,因為如果唔係我哋,佢哋應該唔使乞(我哋有屋住,有飯食,應該係剝削咗佢哋唔少了)!

    (上述不是反對有能力的人應該幫助能力較弱的人,不過...唉!)

    閒人

    回覆刪除
  3. 我覺得教哲學班友仔同o的有錢佬都好似,點解班冚家鏟不學無術係大學可以攞咁高人工?點解政府用咁多納稅人o的錢養佢o地,只是他們懂作沉思狀,講o的懾人的說話,懾人的人名,就要比咁多錢佢?

    yan

    回覆刪除
  4. Well, I agree that the UGC teaching staff is relatively overpaid.

    But academic investigation has a value for the well-being of humanity. That should not be overlooked too.

    It's hard to write good journal papers and it's a lot of investment to become an expert in a particular field.

    willsin

    回覆刪除
  5. 其實有些有錢人係唔會明窮人的處景, 他們只覺得那些人是自己唔去爭取上進,甚至係自己攞尼,正如吳君如o向'一百萬人的故事'裏, 訪問一個都係因為窮,早午晚三餐要食麵包充饑嘅女人, 去問人地:'點解唔買飯盒食姐?'一樣, 睇埋港台'富翁大作戰' 更加覺得做戲咁做,節目完結時,果 D 所謂有錢高薪厚職的富貴人,求求其其扮體驗完,哪住個拖o夾極速閃, 迅速地回去自家的豪宅, 佢地只係扮幾日on schedule 做嘅窮人, 成隊攝製隊跟尾, 體驗??嘿嘿!!
    其實洗咩睇'富翁大作賤',我家吓實實在在置身於事內,經歷緊徹底極窮,無錢,負債,等緊破產的血淋淋事實,下月更由新界村屋搬去離島朋友以超低於市值租金租給我的家...

    路過窮人

    回覆刪除
  6. 其實人的種類實在太多了, 單純用 "窮"或"富"來區分, 也對社會現實失諸交臂.

    窮人有問題, 富人也不見得好到那裡, 不然小甜甜的遺產案不會攪到今日, 不然梁錦濠也不必日日用燒銀紙來燒災.

    --- 都只是人, 人, 和人性. 又有甚麼高和低可言呢?

    回覆刪除
  7. 我平時好憎d明星去完邊度邊度探饑民跟住返黎話:呀,有人咁慘,我咁幸福,真係好感恩.
    但睇呢套我又完全無呢種感覺,我覺得個節目最好既地方,係令人睇到,你有學識肯努力見過乜世面都好,你o係呢d環境入面,都只能一世捱窮! 等班高官唔好再灌輸d似是而非既觀念:o係香港,肯做就得--宜家已經無呢支歌!

    回覆刪除
  8. 同意.
    而且這種貧窮會隔代傳留下來, 是很恐怖的一種不公平.

    回覆刪除
  9. 唉,人生出黎根本唔一樣,因、緣、父母的性格/教育的style,樣樣都唔係我們可控制到,偏偏這些可主宰我們很多。我只是一個自私人,我只關顧我的生活是否安好。

    回覆刪除
  10. 十分同意 , 只係體驗幾日就咁多野講
    人地可是一世都可能係咁,佢地想講既野你地又會知咩?

    富既不懂自愛,不斷搾取窮人一切也是無可口非,因為他生來就是一個剥捎者,所以他們也沒有選擇的餘地

    窮既就只能怪自己唔爭氣或者唔係含住金KEY生世啦

    回覆刪除
  11. 窮人最大問題不只被剥削金錢,更重要的是剥削時間,一個人窮,如果尚有點自己的時間,還可有發圍的機會。

    回覆刪除
  12. 窮人最大的問題?
    他們被剝削時間, 自尊, 機會, 教育下一代的空間. 他們也被剝削了新鮮空氣, 要捱污染, 也剝削了天空, 海洋, 山景, 大自然. 他們也被剝削了資訊, 知識, 聯繫, ...

    他們被奪去的是一切.

    willsin

    回覆刪除