2010年11月8日 星期一

道德圍剿

今日閱報, 聖公會牧師高調譴責四叔個仔借肚產子事件, 還有立法會議員何秀蘭余若薇等質疑李家傑俾錢借肚, 實屬違法云云.

問題是高調借肚的人, 除了四叔個仔之外, 還有其他人, 例如前立會議員陸恭蕙. 她在2005年都在美國做了同樣的事, 還接受訪問, 話想唔到的細路哥咁好玩.

在外國做一些違反香港法例的行為的人多得很, 大把人在大陸和泰國召妓、吸毒, 你余何兩位議員又是否打算追捕呢?

聖公會牧師的批評認為受精卵已有生命, 所以, 據其論證, 理應所有使用試管嬰兒技術懷孕的人都犯了謀殺. 哎呀, 假如是這樣的話, 你要譴責的人又何止李家傑一位呢? 在香港用這個方法生育孩子的無幾千都有幾百, 何以單單批評李氏地產商? (其實如果有道德爭議, 借肚生育所引發的道德問題的重心並不在此).

至於他說的甚麼不合乎自然的受孕方式呀, 炫耀財富呀, 真是浪費了香港人的讀報時間.

前陣子誠哥俾個神父形容為魔鬼, 而家聖公會牧師又個個唔鬧, 淨係揀阿傑仔來出氣, 哎, 地產商不仁不義是事實 (做生意邊個同你講心?), 神父牧師作為社會倫理的代言人亦好應份出聲, 不過呢, 唔該下次做下功課, 用下腦構思好一點論證才出來獻世, 會好一點.

1 則留言:

  1. 認為搞受精卵都有問題嗰個真係誇張左。

    回覆刪除